Կայքը դեռ գտնվում է փորձարկման փուլում։
The site is still under testing.

Սիրիահայ ապագա բժիշկը հայրենիքում բժշկությունը զարգացնելու ծրագրեր ունի

Ազգությամբ հայ, բայց արտերկրում ծնված շատ երիտասարդներ բժշկական կրթություն ստանալու հարցում ընտրում են Երևանի Մխիթար Հերացու անվան պետական համալսարանը: Արտերկրից Հայաստան եկած ապագա բժիշկները դառնում են երկու երկրի մշակույթները կրողները, տարածողները և ներկայացնողները:

ԵՊԲՀ շրջանավարտ Կարապետ Պարսումեանը ծնվել և մեծացել է Սիրիայի Հալեպ քաղաքի հայաշատ թաղամասերում: Մինչև 6-րդ դասարան, սովորել է Ազգային Հայկազյան վարժարանում, իսկ հետո ուսումը շարունակել «Քարեն Եփփէ» ազգային ճեմարանում:

«Սիրիական պատերազմի պատճառով 2012-ին ուսումս կիսատ թողեցի Ճեմարանում և ընտանիքով տեղափոխվեցինք ավելի ապահով շրջան Սիրիայի ծովեզերեքի մասը, ստիպված լինելով ուսմանս մնացած 3 տարիները շարունակել արաբական դպրոցում՝ լինելով միակ հայ ուսանողը 500 աշակերտի մեջ: Սիրիայում ավարտելով 12-րդ դասարանը՝ 2015-ին առանց մեկ րոպե հապաղելու պատրաստեցի անհրաժեշտ փաստաթղթերս և տեղափոխվեցի միշտ երազած իմ հայրենիք՝ Հայաստան»,-պատմում է ապագա բժիշկը:

Կարապետ Պարսումեանը խոստովանում է, որ սկզբում ցանկացել է գնալ մորեղբոր ճանապարհով և դեղագետի մասնագիտությունն ընտրել, հետո փոխել է որոշումը:

«Երբ մտա նախապատրաստական բաժին մեր համալսարանում, նկատեցի, որ այնքան էլ քիմիայի սիրահար չեմ, ինձ ավելի հետաքրքիր էին բժշկական թեմաները, դրա համար որոշեցի բժիշկ դառնալ: Կյանքում չեմ զղջացել Հայաստան տեղափոխվելիս, երիտասարդական տարիներիս ամենալավ օրերն անցկացրել եմ Հայաստանում, Հայաստանը իմ տունն է և չեմ ուզում ուրիշ տեղ գնալ»,-շեշտում է ԵՊԲՀ ընդհանուր բժշկության ֆակուլտետի շրջանավարտը:

Որպես նեղ մասնագիտացում, հավանաբար, կընտրի վիրաբույժի ճանապարհը:

«Դեռ վերջնական չեմ որոշել, բայց վիրահատարանում աշխատանքը ինձ դուր է գալիս և, կարծում եմ, հենց «այդ սիրտը ունեմ», որպեսզի կարողանամ հիվանդին վիրահատել»,- նշում է Կարապետը:

Նա հավելում է, որ շատ հպարտ է՝ բժշկական համալսարանում սովորելու համար:

«100-ամյա պատմությամբ, ուժեղ համազգային կապերի շնորհիվ բուհը մեզ տալիս է գիտելիք, կրթություն, որը ընդունված է առաջատար գրեթե բոլոր երկրներում: Բժշկական մայր բուհը նոր ընկերական շրջապատ ստեղծելու մեծ հնարավորություն է տվել, ծանոթացրել է շատ սիրելի և ազնիվ մարդկանց հետ, որոնք հմուտ և աշխատասեր մասնագետներ են ոլորտում, և իրենք իմ մեջ արթնացրել են սերը բժշկության հանդեպ»,-նշում է ապագա բժիշկը:

 Կարապետ Պարսումեանը բժշկի կերպարը ստեղծելու իր սկզբունքն ու մոտեցումն ունի:

«Բժիշկը ամենաառաջինը պետք է լավ սովորություններ կրող անձ լինի, այսինքն ՝ պետք է չծխի, ալկոհոլ չօգտագործի, զբաղվի ակտիվ սպորտով՝ իր հիվանդներին օրինակ ծառայելու համար: Պետք է նաև հասկանա հիվանդին, բացատրելով նրան շատ հանգիստ՝ ինչ պետք է անել՝ առողջական վիճակը բարելավելու համար: Եվ ամենակարևորը՝ բժիշկը պետք է աշխատանքին մոտենա սառնասրտորեն և անհրաժեշտ պահին ամենայն պատասխանատվությամբ հստակ որոշում կայացնի»,-եզրափակում է հայրենադարձ ապագա մասնագետը: