2022-2023 ուսումնական տարում ԵՊԲՀ-ում առաջին անգամ հետբուհական կրթության բնագավառում ներդրվեց «Պարօդոնտոլոգիա» լրացուցիչ մասնագիտացումը:
Չորսամսյա մասնագիտական ծրագիրն իրականացվում է Մասնագիտական և շարունակական կրթության կենտրոնի Ստոմատոլոգիական և դեղագիտական մասնագիտական կրթության բաժնի կողմից:
Այս ուսումնական տարում լրացուցիչ մասնագիտացումն անցել և առաջինը համապատասխան վկայական է ստացել Ստոմատոլոգիական ֆակուլտետի շրջանավարտ Տիգրան Հարությունյանը, որը կլինիկական օրդինատուրա է անցել Թերապևտիկ ստոմատոլոգիայի ամբիոնում:
Պարօդոնտոլոգիայի հանդեպ սերը Տիգրանի մոտ ձևավորվել էր հինգերորդ կուրսում, երբ առարկան անցնելիս հրապուրվել էր այս ուղղությամբ:
«Դեռևս ուսանողական տարիներին ծանոթանալով պարօդոնտոլոգիային սկսեցի շատ հետաքրքրվել և սիրել այն: Կլինիկական օրդինատուրան ավարտելուց հետո մեկ տարի էր անցել, երբ ինձ ասացին, որ առաջիկայում կներդրվի «Պարօդոնտոլոգիա» լրացուցիչ մասնագիտացում և դրան մասնակցելու հնարավորություն կունենամ»,- ասում է մասնագետը:
Ընդգծում է, որ բժշկական բուհում ստացած գիտելիքները ծառայեցնելու է պրակտիկ գործունեությանը:
Ի՞նչ է պարօդոնտոլոգիան
Պարօդոնտոլոգիան ուսումնասիրում է ատամների բուժումը և կանխարգելումը: Պարոդոնտը ուսումնասիրում է ատամնալնդային բոլոր հյուսվածքները և օժանդակ կառույցները, ատամի արմատը և ատամը կապակցող ապարատը, ինչպես նաև դրանց վրա ազդող հիվանդություններն ու հանգամանքները։ Այդ թվում ներառում է լնդերը (gingiva), ալվեոլային ոսկորը, ցեմենտը, պերիօդոնտալ թելիկները։ Պարոդոնտոլոգիայի ամենատարածված հիվանդություններն են գինգիվիտը (լնդաբորբ), պարոդոնտոզը, պարոդոնտիտը:
«Պարօդոնտոլոգիա» լրացուցիչ մասնագիտացման շրջանակում նրան ուսուցանել են դասախոսներ Լուսինե Հարությունյանը և Մերի Ռաթևոսյանը` ծանոթացնելով հյուսվածքների հետ առնչվող այս ուղղության նրբություններին, փոխանցելով հմտություններ.
«Մեր օրերում պարօդոնտոլոգիան զարգանում է մյուս ոլորտների` իմպլանտոլոգիային զուգընթաց և ժամանակի ընթացքում առավել մեծ ուշադրություն է հատկացվում հիվանդությունների կանխարգելմանը, ատամի բնական տեսքի պահպանմանը, որովհետև սեփական ատամներին անկախ ժամանակակից պրոթեզավորման մեթոդներից ոչինչ չի փոխարինի»:
Այն ստոմատոլոգներին, որոնք առաջիկայում ցանկություն կունենան մասնագիտանալ այս բնագավառում, խորհուրդ է տալիս անպայման դիմել, կրթվել և հարստացնել գիտելիքները:
