Ընդհանուր վիրաբուժության ամբիոն

Ամբիոնի վարիչ՝  Հայրապետ Ալեքսանի Բարսեղյան, բժշկական գիտությունների դոկտոր, պրոֆեսոր, «Աստղիկ» բժշկական կենտրոնի փոխտնօրեն՝ վիրաբուժության գծով:

Ամբիոնը հիմնադրվել է 1954թ.-ին, չորրորդ հիվանդանոցի վիրաբուժական նորաբաց բաժանմունքի բազայի վրա` սանիտարահիգիենիկ ֆակուլտետի կազմում: Առաջին վարիչը եղել է պրոֆեսոր Ռուբեն Լազարի Պարոնյանը, ով մայրենի լեզվով գրված «Վիրաբուժական հիվանդություններ» դասագրքի հեղինակն է (1959թ.): Նա եղել է ինֆեկցիոն հիվանդանոցի վիրաբույժ-խորհրդատուն: Ռուբեն Լազարի Պարոնյանը հանրապետությունում առաջինն է զբաղվել լյարդի պունկտատի բջջաբանական ուսումնասիրությամբ, ինչպես նաև առաջինն է կատարել ստամոքսի մասնահատում խոցային հիվանդության ժամանակ: 2001թ.-ից ամբիոնը ղեկավարում է պրոֆեսոր Հայրապետ Ալեքսանի Բարսեղյանը: Պրոֆեսորը 250 և ավել գիտական հոդվածների, դասագրքերի և ուսումնական ձեռնարկների հեղինակ է: Հ.Ա.Բարսեղյանի ղեկավարությամբ 2019թ.-ին Հայաստանում առաջին անգամ իրականացվել է լյարդի բարեհաջող փոխպատվաստում` կենդանի դոնորից ռեցիպիենտին: 2016թ.-ից ամբիոնը ԵՊԲՀ Վիրաբուժություն թիվ 2 ամբիոնից վերակազմավորվել  և անվանակոչվել է ԵՊԲՀ  Ընդհանուր վիրաբուժության ամբիոնի:

1958թ.-ին մանկաբուժության և 1961թ.-ին ստոմատոլոգիական ֆակուլտետների կազմավորումից հետո այդ ֆակուլտետներում կազմակերպվել է «Վիրաբուժություն» առարկայի  դասավանդումը:

Ներկայումս ամբիոնը դասավանդում է «Ընդհանուր վիրաբուժություն» և «Վիրաբուժական հիվանդություններ» առարկաները ընդհանուր բժշկության (3-րդ կուրս), ռազմաբժշկական (3-րդ կուրս) և ստոմատոլոգիական  (3-րդ, 4-րդ կուրս) ֆակուլտետների ուսանողներին:

Ուսումնառության ընթացքը ներառում է գործնական պարապմունքներ, դասախոսություններ և հերթապահություններ: Ամբիոնը ուսանողների գործնական ունակությունների ձեռքբերման համար կազմակերպում է աշխատանք վիրակապարանում, վիրահատարանում, ախտորոշման բաժանմունքում, վերակենդանացման բաժանմունքում, ինչպես նաև մանիպուլյացիոն սենյակում: Վիրահատարանից կազմակերպվել է ուղիղ հեռարձակում,  գրադարանը համալրվել է հայերեն, ռուսերեն և անգլերեն լեզուներով ժամանակակից գրականությամբ: Ամբիոնում ստեղծվել են համակարգչային ուսումնական ծրագրեր, որոնք պարունակում են ցուցադրական, տեսական և թեստային նյութեր: Ստեղծված տեսադարանում ցուցադրական նյութեր կան դասավանդվող առարկայի բոլոր թեմաներով:Ամբիոնում շարունակվում է ուսումնամեթոդական ձեռնարկների, ուսումնական ուղեցույցների մշակման և տպագրման աշխատանքները: Ամբիոնի ապահովվածությունը ուսումնամեթոդական ձեռնարկներով տարեցտարի համալրվում է: Հետդիպլոմային ուսուցումն ամբիոնում ներկայացված է օրդինատուրայով և ասպիրանտուրայով (3 տարի տևողությամբ)` ընդհանուր, աբդոմինալ, էնդոկրին և լապարասկոպիկ վիրաբուժություն մասնագիտացումներով:

Ամբիոնի գիտահետազոտական աշխատանքներն ունեն հետևյալ ուղղությունները.

• աբդոմինալ վիրաբուժության մեջ բարդությունների կանխարգելում և բուժում
• վահանաձև և հարվահանաձև գեղձերի հիվանդությունների վիրահատական բուժման բարդությունների կանխարգելում
• հեպատոպանկրեատոբիլիար վիրաբուժություն
• լյարդի փոխպատվաստում

Ամբիոնը համագործակցության սերտ կապեր է հաստատել ՌԴ-ի, Թայվանի, Ավստրիայի, Գերմանիայի, Իտալիայի, Հնդկաստանի վիրաբուժական կլինիկաների հետ, ինչի շնորհիվ էլ մեծ առաջընթաց է արձանագրել լյարդի փոխպատվաստման, լապարոսկոպիկ և էնդոկրին վիրաբուժության բնագավառներում:
Ուսումնամեթոդական աշխատանքների փորձի փոխանակումն ամբիոնում կատարվում է խորհրդակցությունների, կլինիկական կոնֆերանսների միջոցով:

Արտասահմանյան բժշկական բուհերի ուսումնամեթոդական աշխատանքների փորձի ուսումնասիրումը կատարվում է վիդեոկոնֆերանսների, միջազգային կոնֆերանսների և համահավաքների միջոցով:

ԵՊԲՀ ընդհանուր վիրաբուժության ամբիոնի պրոֆեսորադասախոսական ողջ կազմը կլինիկական ակտիվ գործունեություն է ծավալում ամբիոնի հետևյալ բազաներում.

1. «Աստղիկ» ԲԿ
2. «Շենգավիթ» ԲԿ
3. «Միքայելյան ՀՀ»
4. «Սլավմեդ» ԲԿ
5. «Ս. ԳրիգորԼուսավորիչ» ԲԿ
6. «Մեդլայն» ԲԿ