Դեղագործության կառավարման ամբիոն

Երևանի Մխիթար Հերացու անվան պետական բժշկական համալսարանում դեղագործական կրթության զարգացման կարևոր փուլերից մեկը հանդիսացավ 1972 թվականին դեղագիտական ֆակուլտետի ստեղծումը։ Դրան հաջորդեց 1974 թվականին «Դեղերի տեխնոլոգիայի, դեղագործության էկոնոմիկայի և կազմակերպման» ամբիոնի հիմնադրումը, որտեղ դասավանդվում էին «Դեղերի տեխնոլոգիա», «Բժշկական ապրանքագիտություն» և «Դեղագործության կազմակերպում և էկոնոմիկա» առարկաները։

Դեղագործական գիտությունների և պրակտիկայի զարգացմանը համընթաց՝ «Դեղագործության կազմակերպում և էկոնոմիկա» առարկան, որպես «Դեղագործություն» մասնագիտության կարևորագույն ուղղություններից մեկը, 2006 թվականին առանձնացվեց և ձևավորվեց նոր՝ «Դեղագործության կառավարման» ամբիոնը։ Ամբիոնի հիմնադրման հիմնական նպատակը ապագա դեղագետներին դեղագործական գործունեության կառավարման, դեղագործական մարկեթինգի, էկոնոմիկայի և սոցիալական ֆարմացիայի ոլորտներում ժամանակակից տեսական գիտելիքներով և գործնական հմտություններով ապահովելն է։

2016 թվականի սեպտեմբերից ամբիոնում վերսկսվել է նաև «Բժշկական և դեղագործական ապրանքագիտություն» առարկայի դասավանդումը, ինչը նպաստել է ուսումնական ծրագրի ընդլայնմանը և մասնագիտական պատրաստվածության առավել ամբողջական կազմակերպմանը։

Ամբիոնում ուսուցումը կազմակերպվում է դասախոսությունների, գործնական և ցիկլային պարապմունքների ձևաչափերով՝ դեղագիտական ֆակուլտետի բակալավրիատի 3-րդ և 4-րդ կուրսերում, ինչպես նաև մագիստրատուրայում։

Ուսումնական գործընթացի հիմքում դրված են դեղագործական կառավարման և մարկեթինգի, դեղատնային կազմակերպությունների գործունեության կազմակերպման, ֆինանսական կառավարման, դեղագործական ծառայությունների մատուցման, ինքնաբուժման կառավարման և դեղագործական հոգածության պատշաճ իրականացման հիմնարար հարցերը։ Ամբիոնը հրատարակել է մեթոդական ձեռնարկներ հայերեն և անգլերեն լեզուներով։

Ամբիոնում դեղը դիտարկվում է ոչ միայն որպես բուժական միջոց, այլև որպես առանձնահատուկ ապրանք, որն ունի գովազդի, վաճառքի, բրենդինգի, լոգիստիկայի, գրանցման, պետական գնումների և կեղծման կանխարգելման յուրահատուկ առանձնահատկություններ։ Դասընթացների ընթացքում ուսանողները ձեռք են բերում ժամանակակից դեղագործական համակարգում արդյունավետ գործունեություն իրականացնելու համար անհրաժեշտ մասնագիտական գիտելիքներ և գործնական կարողություններ։

Ընդհանուր ռազմավարությունը և նպատակները

Ամբիոնի գիտահետազոտական գործունեությունն ուղղված է միջազգային դեղագործական շուկայի ժամանակակից միտումների ուսումնասիրմանը և դրանց ներդրմանը ՀՀ առողջապահական համակարգում: Հետազոտությունների առանցքում է սոցիալական ֆարմացիան՝ որպես դեղագործական գործունեության հանրային և կլինիկական արդյունավետության ապահովման հիմնասյուն:

Հիմնական գիտահետազոտական ուղղությունները և արդյունքները․

• Դեղագործական խորհրդատվություն և հոգածություն։ Մշակվել են մասնագիտական ալգորիթմներ և գործնական առաջարկություններ՝ դեղագործական խորհրդատվությունը որպես առողջապահական ծառայության անբաժանելի բաղադրիչ ամրապնդելու համար:
• Ռացիոնալ դեղաթերապիա և ինքնաբուժում։ Վերլուծվել են ինքնաբուժման տարածվածության և դեղերի ոչ ռացիոնալ կիրառման ռիսկերը: Մշակվել են առաջարկներ բնակչության իրազեկվածության բարձրացման և դեղատան աշխատակցի կողմից պատասխանատու ինքնաբուժման կառավարման վերաբերյալ:
• Օրենսդրական և մակրոտնտեսական կարգավորումներ։ Ուսումնասիրվել են բժշկական սարքերի ներմուծման ու գրանցման ընթացակարգերը, բացահայտվել են օրենսդրական հիմնախնդիրները և առաջարկվել կարգավորման ուղիներ:

Գիտական արդյունավետություն։ Հետազոտությունների արդյունքներն ամփոփված և տպագրված են բազմաթիվ հոդվածների տեսքով ինչպես տեղական, այնպես էլ արտասահմանյան առաջատար գիտական և ազդեցության գործակցով (Impact Factor) պարբերականներում: