Պատմություն
1922թ.-ի մարտի 15-ին Երևանի պետական համալսարանում ստեղծվում է բժշկական ֆակուլտետ, որի բազայի վրա հիմնադրվում է բժշկական ինստիտուտը: Վ. Արծրունու նախաձեռնությամբ հիմնադրվում է անատոմիայի ամբիոնը: Անատոմիայի ամբիոնը տեղակայված է եղել նախկին լվացքատան երկու խարխուլ սենյակում, որոնք գտնվում էին ախոռատան կողքին: Դասերը տեղի էին ունենում լամպի լույսի տակ կամ ախոռատան բակում, չկային հայերեն լեզվով ձեռնարկներ և դասագրքեր: 1923թ հրատարակվեց Վ. Արծրունու անատոմիայի առաջին դասագիրքը, 1924թ-ին՝ <<Ռուսերեն–լատիներեն-հայերեն բժշկագիտական տերմինների բառարան>>-ը, որը հայկական բժշկագիտական տերմինաբանության զարգացման հիմքը հանդիսացավ (Հ. Հովհաննիսյան, Հ. Հակոբյան, Ա. Բեկզադյան, Վ. Գրիգորյան)։ Մանկավարժական աշխատանքները, այդ թվում` դասախոսություններն ու գործնական պարապմունքները, ավելի բարձր մակարդակի հասան, երբ 1926թ.-ին Ա. Թամանյանի նախագծով կառուցվեց անատոմիկումի մասնաշենքը: Վ. Արծրունու նախաձեռնությամբ, ամբիոնը տեղափոխվեց և մինչև այսօր էլ գործում է անատոմիական մասնաշենքի երկրորդ հարկում:
Վ. Արծրունու նախաձեռնությամբ ամբիոնին կից ստեղծվել է անատոմիական թանգարան, որը հետագայում կոչվել է նրա անունով: Թանգարանը կարճ ժամանակում հարստացել է անհրաժեշտ ցուցանիշներով և հետագայում մեծ դեր է ունեցել ուսանողների ուսուցման և դաստիարակության գործում: Տարբեր տարիներին ամբիոնում աշխատել են՝ Ե. Թ. Շեկ-Հովսեփյանը, Ե. Ա. Բայրամյանը, Հ. Հակոբյանը, Լ.Վ. Վարդանյանը, Ա. Ա. Սարաֆյանը, Ք. Մ. Այվազյանը, Շ. Թ. Պետրոսյանը, Հ. Մ. Այնաջյանը, Լ. Սարգսյանը, Լ.Ա. Մանուկյանը, Գ.Պ. Քյալյանը և ուրիշներ:
Անատոմիայի ամբիոնը ուսումնական գործընթացը պատշաճ մակարդակով ապահովելու նպատակով ունի համապատասխանող գիտամանկավարժական բազա՝ թանգարան, ցուցանմուշներով, նկարներով, մուլյաժներով հագեցված լսարաններ և դասասենյակներ: Ամբիոնի պրոֆեսորադասախոսական կազմը տիրապետում է առարկայի դասավանդման և գիտելիքների ստուգման արդիական մեթոդներին և բարձր մակարդակի դասավանդում է ապահովում համալսարանի բոլոր ֆակուլտետներում` հայերեն, ռուսերեն և անգլերեն լեզուներով։ Ամբիոնի նոր ձեռքբերումներից է ինտերակտիվ ուսուցողական ծրագրեր պարունակող անատոմիական սեղանը, որը հնարավորություն է ընձեռնում ուսանողին մարդու մարմնի կառուցվածքը ուսումնասիրել եռաչափ պատկերով, նպաստելով ուսանողի մոտ տարածական պատկերացման ստեղծմանը:
Ուսուցում
Ամբիոնում իրականացվում է «Մարդու անատոմիա» առարկայի ուսուցում։ Առարկան դասավանդվում է ընդհանուր բժշկության և ստոմատոլոգիական ֆակուլտետների հայալեզու, ռուսալեզու, անգլալեզու I և II կուրսի ուսանողներին։ Առարկան ընդհանուր բժշկության ֆակուլտետում դասավանդվում է I, II, III կիսամյակներում, իսկ ստոմատոլոգիական ֆակուլտետում` I և II կիսամյակներում` գործնական պարապմունքների և դասախոսությունների ձևով: Առարկայի ուսումնառությունը և ատեստավորումը իրականացվում է մոդուլային ձևաչափով` գնահատման բազմաբաղադրիչ համակարգով: Յուրաքանչյուր մոդուլի գիտելիքների գնահատման համակարգում բաղադրիչների համամասնությունը (10 բալային համակարգ) հետևյալն է` կիսամյակային բաղադրիչ` 2 միավոր (20%) և քննական բաղադրիչ` 8 միավոր (80%): Մոդուլային համակարգում առարկան ուսումնառվում է ռադիոլոգիայի, կլինիկական անատոմիայի, հյուսվածաբանության, ֆիզիոլոգիայի հետ համատեղ:
Կիսամյակային բաղադրիչը ձևավորվում է կիսամյակի ընթացքում բաղադրիչների միավորների գումարով (առավելագույնը 2 միավոր (20%)): Այն իր մեջ ներառում է անատոմիական ատլասներից օգտվելու ունակության ստուգում նկար թեստերի ձևով, անատոմիական գոյացությունների ճանաչում (գործնական ունակության ստուգում)` բանավոր հարցման ձևով և ընթացիկ բանավոր հարցումներ: Քննական բաղադրիչը ձևավորվում է համակարգչային թեստային քննությունից ստացած միավորով (առավելագույնը 8 միավոր (80%)): Մոդուլի վերջնական գնահատականը ձևավորվում է առարկայական բաղադրիչների կիսամյակային բաղադրիչների և քննական բաղադրիչի գումարով:
Ամբիոնում ուսումնական գործընթացը իրականացնելու նպատակով օգտագործվում են անատոմիական նկարներ, ատլասներ, պատրաստուկներ, մոդելներ, որոնք անընդհատ նորացվում են և համալրվում: 2021թ. ամբիոնը համալրվեց Պիրոգովի անատոմիական սեղանով, որը նպաստում է մատուցվող նյութի հեշտ ըմբռնմանը և ստացած գիտելիքների ամբողաջացմանը:
Գիտահետազոտական աշխատանքներ
Վերջին տարիների ընթացքում ամբիոնի գիտահետազոտական աշխատանքները տարվել են միկրոշրջանառության հունի առանձնահատկությունների ուսումնասիրման ուղղությամբ՝ ինչպես կլինիկայում, այնպես էլ փորձարարական պայմաններում։ Հետազոտությունները կատարվում են կլինիկական բժշկության պահանջներից ելնելով և ստացված նոր փաստացի տվյալների գործնական կիրառման հեռանկարով։
Ամբիոնում կատարվում են հետևյալ գիտահետազոտական աշխատանքները՝
- Էքստրա և ինտրապինեալային մելատոնինի դերը ենթաստամոքսային գեղձի արտազատիչ և ներզատիչ ֆունկցիաների մոդուլյացիոն պրոցեսներում:
- Մելատոնինի դերը միկոկարդի կծկման ակտիվության և միկոցիրկուլյատոր ուղիների թափանցելիության կարգավորման գործընթացներում:
- Մարսողական խողովակի, բարակ աղիքների և որդանման ելունի լիմֆոիդ ապարատի կառուցվածքաֆունկցիոնալ բնութագիրը Կրաշ համախտանիշի ժամանակ:
- Հիպոթալամոհիպոֆիզար, մակերիկամային համակարգի կառուցվածքային ֆունկցիոնալ փոփոխությունները երկարատև ճնշման համախտանիշի պայմաններում:
- Պրե-, պերի-, նեոնատալ և ժառանգական ռիսկի գործոնների դերը աուտիկ խանգարումների առաջացման գործում:
Պրոֆեսորադասախոսական կազմ
Անուն,ազգանուն,հայրանուն | Ամբիոնում զբաղեցրած
պաշտոն |
Գիտական աստիճան | Գիտական կոչում | |
1 | Բարոյան Կարինե Մինասի | ամբիոնի վարիչ,
դոցենտ |
Բ.գ.թ. | դոցենտ |
2 | Հարությունյան Աննա Ջոնիկի | դոցենտ | Բ.գ.թ. | դոցենտ |
3 | Վարդազարյան Վարդան Մարտինի | դոցենտ | Բ.գ.թ. | |
4. | Զարգարյան Անահիտ Լևոնի | դոցենտ | Բ.գ.թ. | |
5. | Մինասյան Մարիաննա Արտավազդի | դոցենտ | Բ.գ.թ. | |
6. | Խաչատրյան Ժուլիետա Ռուբենի | դասախոս | ||
7. | Մկրտչյան Կարինե Գաբրիելի | դասախոս | ||
8. | Դանիելյան Նաիրա Ստեփանի | դասախոս | ||
9. | Աթոյան Անահիտ Գրիշայի | դասախոս | ||
10. | Մխիթարյան Մերի Աշոտի | դասախոս | ||
11. | Մխիթարյան Գայանե Կոնստանտինի | դասախոս | ||
12. | Հովհաննիսյան Վիլենա Վալենտինի | դասախոս | ||
13. | Բախշյան Սյունե Մյասնիկի | ասիստենտ |